مسلسلات مغمورة: You, me and the apocalypse

You, me and the apocalypse مسلسل كوميدي/درامي من إنتاج أمريكي/بريطاني. بس قبل ما نبدأ أحب أحذرك، لو أنت من الأشخاص اللي مبيقبلوش الأفكار الغريبة أو بيحسوا أنها غير واقعية تمامًا، وديه بالنسبة لك حاجة مش كويسة، ابعد عن هنا بسرعة! المسلسل بتدور فكرته حوالين أخر أيام البشرية. الحياة المملة لمدير بنك بتتشقلب تمامًا لما يعرف أن نهاية العالم قربت بسبب أن مذنب هيصطدم بالأرض وهيدمرها تمامًا.

المسلسل مبيعرضش حياة مدير البنك بس، لأ بيستعرض كمان حياة صاحبه الأهبل نوعًا ما، وراهبة في الفاتيكان كانت عايشة في الدير طول عمرها ومعندهاش خبرة كبيرة بالعالم الخارجي، وأم لأبن عبقري في الهاكينج، ومسجونة عنصرية جدًا، وحد تاني بس مش هحرقلكوا المسلسل كفايه كده. لو عايز تعرف أد ايه المسلسل غريب بالظبط فكل اللي محتاج تعرفه أن كل الشخصيات ديه مرتبطة ببعضها وكلهم مرتبطين بإرتكاب جريمة إلكترونية كبيرة، وهي إختراق الـ NSA.

الشخصيات ديه كلها قدامها 34 يوم على نهاية العالم وكل حاجة يعرفوها. منهم اللي هيستغل الفترة ديه فإنه يحقق أحلامه، ومنهم اللي هينطلق في مغامرة للبحث عن شخص تاني مهم بالنسباله، ومنهم اللي هيكون مشغول بأنه يدور على المسيخ الدجال (Yup, you read that right, don’t worry.) الشخصيات مكتوبة بشكل كويس، وأداء الممثلين في العام مُرضي، وبنلاقي أن الممثلين الأمريكان أدائهم بيتفوق على أداء الممثلين البريطانيين خصوصًا Rob Lowe و Megan Mullaly. المسلسل حلو في إنه تغيير عن الـ Cliches المعتادة اللي بتتكرر في المسلسلات كل شوية.

المسلسل بيمزج ما بين الكوميديا الذكية المشهورة بيها المسلسلات البريطانية، وسرعة إيقاع أحداث المسلسلات الأمريكية. لو أنت غريب عن المسلسلات البريطانية ومتفرجتش منها على حاجة قبل كده، فممكن تحس بغرابة الممثلين شوية أو أن الكوميديا مش واضحة أوي، ممكن متكونش فيه مشاهد كتيرة توقعك على الأرض من الضحك، لكن هتكون مبتسم معظم الوقت. هتلاقي إن المسلسل في أوله أخد طبع كوميدي، وكل ما بيقربوا على نهايتهم المسلسل بيبتدي ياخد الطابع الدرامي شوية بس مش بطريقة فجائية تخلي المشاهد يخرج من الـ Mood فجأة، وده من مميزات المسلسل إن كتابته كويسة جدًا وتطور الأحداث فيه بيشد المشاهد إنه يعرف أكتر. لو أنت كان قدامك 34 يوم على نهاية العالم هتعمل فيهم ايه؟

IMDB Link: http://www.imdb.com/title/tt4337894/?ref_=nv_sr_1
Seasons: 1
Episode: 30 mins.

?Hacking, the apocalypse and British accents, what’s not to love, right