مراجعة انيمي Danshi koukousei no nichijou


Ahhh Slice of Life,
لو كنت من الأشخاص اللي مبيحبوش يحطوا نفسهم في مكان الشخصيات ، فاظن انك لازم على الأقل تدي فرصـه للأنمي دا ! ” دانشي كوكوسي نو نيشيجو ” هو انمي مُختلف عن اي آنمي كوميدي تاني ، لإنه بدل من استخدام فكرة القصه المُستمره .. هو استخدم فكرة الإسكتشات المُتعدده ، لذلك انا مش هبالغ لما اقول ان دا من اكتر الأنميهات الكوميديه المُفضله بالنسبه لي.

القصه :
على الرغم من عدم وجود قصه متواصله ، إلا ان انمي دانشي كوكوسينو نو نيشيجو قدر انه ينجح في تنفيذ سيناريوهات مُتعدده ومُسليه جداً ، كل اسكتش منفصل يُعتبر مش قصير اوي لكن الأهم انه بيقدر يلفت انتباهي ، الضحك على مجموعه من الأولاد المُزعجين بيعملوا حاجات غير طبيعيه !! ، اللي هو انت مستني ايه من آنمي بالأسم دا ؟ .. غير كدا ، كل حدث في الاسكتش بيساهم بعد كدا بشكلٍ ما في احداث اسكتشهات مُستقبليه على مدى الأنمي .. ويمكن هو دا الرابط الوحيد بين الحلقات
danshi-koukousei-no-nichijou-full-1775337
الرسم :
عليّ ان اعترف ، في الأول الرسم مكنش جذاب اوي بالنسبه لي ، الخلفيات غير مُلفته ، والألوان مش بارزه ، وتصاميم الشخصيات كانت تقليديه ، وبعض الشخصيات الثانوية ” اغلبهم بنات ” وشهم مكنش بيترسم اصلاً .. ! ، ولكن برغم ذلك ، بعد ماندمجت مع المسلسل اكتر ، حسيت ان كل شخصيه مرسومه بشكل فريد وطريقه مُميزة . على آخر الأنمي كدا ..هتلاقي نفسك انك بتوصف الشخصيات على طريقة ” الولد ابو طاقية ” .. او ” الولد الأسمر اللي بشعر أشقر ” ، واكتر حاجه عظيمه في الرسم اللي عجبتني انا شخصياً .. هي تعابير وشهم

الأصوات :
الأصوات عادية نوعاً ما ، ومش مميزين اوي غير في بعض المواقف ، غير كدا الموسيقي الخلفيه لوحدها تقدر تضحكك ! ، دا لإن في اسكتشات مُعينه بيبقى ليها تراك مخصوص ، لذلك اول مالمزيكا دي تشتغل تاني خصوصاً لو كانت في اسكتش ضحكك قبل كدا .. هتلاقي نفسك بتبسم تلقائياً رغم ان مفيش حاجه حصلت لسه

الشخصيات :
كل الشخصيات الموجودة مضحكه جداً، ولكن بعضها كانت تحمل صفات “الشخصية الكوميدية النمطية”. وبرغم ذلك فإن تنوع الشخصيات الأخري أدى إلى موازنة هذا الأمر, معظم الشخصيات من الذكور ، ومع ذلك في بعض الحلقات على قرب نهايتها كدا بيبقى في اسكتشات بتتضمن شخصيات نسائيه بتساهم في احداث القصه الرئيسيه ، بعضهم مُزعج .. خصوصاً اصواتهم !! ، بس دا ميقللش ابداً من مقدار الضحك .. فلو كنت بتدور على شخصيات ديناميكيه فأظن ان مش دا الأنمي المناسب ليك .. لإن من مشاهدتي للأنمي مشوفتش اي تغيرات دراميه للشخصيات لذلك لو كنت بتدور على شخصيه هتطور نفسها بعدين وهتبقى نسخه احسن .. نوب ، سوري !.
danshi-koukousei-no-nichijou-animesfox-br
الإستمتاع
اقدر اقول بكل ثقه اني استمتعت جداً بالأنمي دا .. كان ممتع جداً لدرجة اني حسيت اني لازم اكتب ريفيو عنه حته بعد مرور سنين عليه ، على الرغم من ان الأنميز الكوميديه بيتحس ناحيتها ياما بالحب ياما بالكره ، إلا اني اظن انه من المستحميل انك حته تكره الأنمي دا .. إلا إذا كنت مبتحبش نظام الأسكتشات وعايز يبقى فيه حبكه مستمره فعلاً
danshi-gify
لو وصلت لنهاية الريفيو ولسه الأنمي ملفتش انتباهك .. يبقى حقيقي انا مش عارف اعمل ايه تاني !! ، كل اللي هقدر اقوله انك هيفوتك مُتعه كبيره ، لو شوفت الحلقه الأولى ولسه مقتنعتش بيه ، يبقى اظن انه مش مناسب ليك ، في الأول وفي الأخر الضحك دا شىء ذاتي .. واظن انك ممكن تلاقي كوميديه افضل في اي آنمي آخر .


  • Characters - 8/10
    8/10
  • Story - 7/10
    7/10
  • Enjoyment - 10/10
    10/10
  • OST - 7/10
    7/10
  • Voice Acting - 9/10
    9/10
  • Animation - 9/10
    9/10
8.3/10

AccelMody

Not your typical credit and not your so typical anime watcher
i go by never judge by it's genre who knows might be fun and one more thing
All Hail Lelouch

Advertisement