مراجعة Final Fantasy XV


في E3 2006 كان الاعلان الاول للعبة Final Fantasy Versus XIII و من هنا بدات رحلة تطوير مليانة مشاكل مرت علي اكتر من محرك و اكتر من مخرج و تغيير اسم اللعبة لـFinal Fantasy XV

يمكن سمعتو الكلام دا مني قبل كده ان فعليا تطوير الجزء الـ15 من سلسلة زي Final Fantasy ابتدي من 2012 تقريبا من بداية تطوير اجهزة الجيل الجديد من Xbox One و Playstation 4, لكن طول فترة الانتظار دي اكيد ولدت شوية حماس و توقعات عالية عند ناس كتير, و بكل تأكيد Final Fantasy XV من افضل الالعاب اللي لعبتها في 2016 و لكن هل هي كانت قد التوقعات و قد كل مدة الانتظار دي ؟؟ هنعرف الاجابة مع بعض في خلال المراجعة.

قبل ما نتكلم عن اي حاجة تخص القصة سبق و نبهت ان قصة اللعبة مش مرتبطة بالاجزاء اللي فاتت انما مرتبطة بانمي من 7 حلقات و فيلم و هو Kingsglaive و ضروري و بشدة قبل لعب اللعبة تتفرجوا عليهم لانهم ميعتبروش حاجة معمولة علي سبيل الـFan Service انما هما الاتنين بالفعل معمولين عشان يكونوا جزء مهم جدا من تجربة القصة.

الانمي اللي هو Brotherhood ركز علي علاقة بطل اللعبة Noctis باصدقائه اللي علي طول معاك في اللعبة من فترة الطفولة لاوائل احداث اللعبة, و الفيلم يعتبر مقدمة الاحداث من الناحية السياسية للعبة نفسها و ممكن تعتبروه Cut Scene بداية اللعبة بس مدته ساعة و نص.

قصة اللعبة عموما بتتكلم عن صراع بين مملكة Lucis و امبراطورية Niflheim اللي بيدفع Noctis بطل اللعبة بعد لما كان المفروض انه يحضر فرحه علي الاميرة Lunafreya يرجع عشان يستعيد الحكم من جديد بمساعدة اللي ممكن نقول انهم حراسه الشخصيين و اقرب اصدقائه في نفس الوقت.

علي عكس الاجزاء اللي فاتت من Final Fantasy اللي كانت بتحاول تخش في تعقيدات كتيرة في حبكة القصة و عرض الـLore و التاريخ اللي ورا احداث اللعبة هنا مش هنلاقي الكلام دا كتير, اللعبة اعتمدت علي انها تكون مباشرة و بسيطة و  مفهاش تعقيدات كتيرة في الاحداث وهتلاقي من حواليك ان في اه Lore عن احداث و ملوك و حروب حصلت في عالم اللعبة و بتشوف اثرها زي الـAstral War او تقنيات الجيوش الخاصة بامبراطورية Niflheim بس اللعبة مش هتشغل نفسها بالجوانب دي و هتركز اكتر علي الـ4 اشخاص الاساسيين و علاقتهم و صداقتهم ببعض.

و في الحقيقة اللعبة قدمت الجانب دا بشكل حلو جدا, اللعبة فعلا من خلال Noctis و Prompto و Ignes و Gladio قدمت حالة ممكن نقول من الاخوية كانت جميلة و خصوصا في الفصول الاخيرة من القصة و طول اللعبة في اكتر من اختبار لصداقتهم وسط كل اللي بيمروا بيه و بعد لما خلصت القصة خدت بالي من اني فعلا كنت حابب وجود المجموعة دي من الشخصيات ادامي بتعلقاتهم و كلامهم علي رغم من اي انطباع الناس ممكن تاخده عن شكلهم اللي اقرب للـBoy Bands.

لكن دا مش معناه ان القصة كانت باعتمادها علي الجانب دا بس و تقديمه بشكل كويس يبقي مفهاش اي عيوب لا في عيوب و تحديدا في الشخصيات الجانبية التانية في اللعبة من ناحية عدم توضيح دوافعهم بشكل كبير بشكل يخلي الواحد يحس ان في مواقف معينة معتمدة علي تطور شخصياتهم كان لازملها توضيح اكتر.

فا القصة كان مستواها الي حدا ما جيد بالنسبة للهدف اللي هي كانت عاوزه تقدمه اللي هي قصة عن صداقة اكتر من انها قصة عن صراع سياسي بس عن نفسي شخصيا كنت اتمني عرض الـLore بتاع عالم اللعبة بنسبة اعلي من كده و زي ما قلت بعض الشخصيات يتسلط الضوء عليهم اكتر

لكن بالنسبة بقي للـGameplay عندنا جوانب كتير ممكن نتكلم عنها كعادة اي لعبة RPG. اللي بتقدمه Final Fantasy XV مختلف عن الاجزاء اللي فاتت من السلسلة من ناحية الكومبات بالتحديد لان عكس اسلوب الـTurn Based القديم ان كل شخصية تاخد دورها في ضربة او اي اكشن معين هنا اللعبة بقت Real Time Action  بنفس الشكل اللي هو الناس متعودة عليه من اي 3rd Person RPG.

و الـCombat System في اللعبة كانت الميزة الاهم و اساس اللعبة عموما لانه اتقدم بشكل ممتاز و فيه تفاصيل كتير تخليه مختلف و مميز عن لعبة RPG تانية.

الكومبات هنا بخلاف انه سريع جدا بس كان في بعض الجوانب اللي عليك و انت بتلعب تبقي مدركها كويس عشان تعرف تتحكم في نوكتس, الموضوع مش مجرد رزع في الزراير و خلاص. و الجوانب دي  زي مثلا ازاي هتستخدم الـDoddging صح لانه مختلف عن اي لعبة تانية و تعرف كل سلاح انت هتستخدمه  الـAnimation بتاعه سواء بالضربات العادية او ضربة الـWarp In بيكون ماشي ازاي ؟؟ ايه التوقيت اللي بياخده السلاح عشان يحقق الضربة دي ؟؟

و غير كده في وسط الـCombat في حاجة قريبة شوية لفكرة الاجزاء اللي فاتت اللي اعتمدت علي نظام الـTurn Based و اسمها Wait Mode و ليك مطلق الحرية تستخدمها ولا لا و دي بتحددلك نقاط ضعف  و تخليك تدرس اي موقف و اي هدف قدامك سواء كان ايه هو السلاح او الـSpell اللي ممكن تضعفه او ممكن تستغل الـWait Mode عشان توزع Potions علي الفريق اللي معاك برضو.

يمكن مشكلة الـCombat اللي بتظهر ساعات هو وجود بعض الشجر او حيطان مثلا و بيكونوا متوزعين في بعض الاماكن و انت بتلف الكاميرا ممكن يعترضوك دي حصلت معايا كذا مرة علي رغم اني دايما مظبط الكاميرا انها تاخد زاوية بعيدة عن المواجهة, هي مكنتش بتتكرر كتير معايا بس كانت ملحوظة و ممكن تتفاداها بانك تعمل Lock On علي هدف قدامك.

بالنسبة للفريق  اللي معاك بيكون ليهم دور كبير من ناحية قدرات خاصة بيهم ممكن تطلب منهم يعملوها او بعض الحركات القتالية اللي بتطلع منهم في وسط المواجهات بعد لما بتقدر انك تشل حركة اي هدف انت بتواجهه و و ساعات ليهم بعض القدرات اللي بتبقي مهمتها تقديم دعم اكتر من انها تكون حاجة هجومية.

و من هنا بنلاقي ان بنسبة كبيرة جدا الـRPG elements بتاعت اللعبة مبنية علي الـCombat System دا, سواء انك تركز و تشوف الاسلحة ايه الـStats بتاعتها و تعرف نقاط ضعفها و قوتها و  في Skill Tree كبيرة جدا و متشعبة و بتحدد انت من خلالها انت عاوز تركز علي ايه في اسلوب لعبك و بتطور منها برضو قدرات الفريق اللي معاك و تفتج Skills جديدة ممكن يستخدموها.

هل الـCombat بيقف عند هنا لا في نظام جديد تماما للـMagic في اللعبة و هو بسيط جدا لكن فعال بشكل كبير في المواجهات

و البساطة في حتة الـCrafting نفسه, الموضوع بيطلب انك تجمع الا 3 عناصر من كهربا و تلج و نار و تعمل منهم الـSpells

او ممكن تدمج تأثير بعض الـPotions مع استخدام الـSpells دي كمان.

الـCrafting عموما في اللعبة كان مركز علي الاكلات اللي بيقدمها Ignes .. ايوة زي ما سمعتوا الاكلات, هي غير وظيفة تجويعك بمنظرها بس هي تعتبر زي Buffs انت بتعملها من مواد بتلمها عشان تقدر تقوي بيها حجات معينة زي الـAttack او الـDefense و الـMagic و الـCrafting عموما مش هيطلع برة اللي احنا اتكلمنا عنه دا و دي عموما العناصر اللي مرتكز عليها الـRPG Elements في اللعبة, علي رغم انها من الممكن متكونش بتشعب و ضخامة تفاصيل اي لعبة RPG تانية بس اللعبة قدرت انها توفق بين حجات كتير مطلوب منك تفهمها عشان تبقي افضل من خلال الـCombat System بتاعها و اللي كان سلس و ممتع و بين ان باقي الجوانب تكون بسيطة و مش معقدة.

عالم اللعبة و خصوصا انها لعبة عالم مفتوح كانت نقطة مهمة جدا في اللعبة لان اللعبة بتقدم تقريبا اكبر عالم مفتوح انا شوفته لحد دلوقتي.

المنطقة اللي فيها احداث اللعبة و هي Eos كان فيها تنوع بشكل جغرافي الحقيقة عظيم و تفاصيل كتيرة جدا من خلال العالم دا سواء في المناطق اللي بتكون مفتوحة او غابات او مستنقعات او جبال من الممكن تطلعها.

حيوية العالم  بتيجي من الحياة البرية نفسها في كم كبير من الحيوانات و الوحوش اللي موجودة حواليك لان المنطقة اللي بتحص فيها اللعبة بعيدة عن مدن في اه مدينة صغيرة في نص الخريطة بس اقدر اقول ان 95% من عالم اللعبة المناطق البرية اللي انت بتشوفها قدامك.

استكشافك للعالم دا بيجي بـ3 وسايل العربية اللي معاك علي طول و هي الـRegalia و دي للاسف سبق و اتكلمت عنها قد ايه هي محدودة و بشدة في تنقلك بيها غير انها بطيئة جدا في الحركة لحد ما تقدر تفتح تاني وسيلة تنقل و هي  التعديلات اللي بتخليها تطير في مرحلة متقدمة شوية من اللعبة, و في الـChocobos الحيوانات الاشبه بالنعام و دول حرية التنقل بيهم اعلي بكتير في اي حتة في الخريطة.

المهمات في اللعبة تعالوا نتكلم عنها شوية و نبدأ الكلام بالمهمات الاساسية و اللي كانت مقسومة لجانبين مهمات في العالم المفتوح للعبة و مهمات بتصميم خطي في الفصول الاخيرة من احداث اللعبة.

المهمات اللي كانت في العالم المفتوح للعبة كانت مستواها حلو ا من ناحية المواقف و اللي ممكن نسيمها الـEpic Moments اللي انت بتشوفها و بتعيشك اجواء القصة خصوصا بعض الـBoss Fights اللي ليها حجم ضخم شوية شويتين.

االمهمات اللي بتاخد طبعا خطي  هي مفرقتش كتير عن طبيعة المهمات التانية بس الفكرة انك متقدرش تخش العالم المفتوح تاني بعد لما بتخلصها فا بتطلع من واحدة للتانية لحد اخر القصة, و هي الحقيقة ابتدت بداية قوية جدا بتقريبا واحد من افضل فصول اللعبة و لكن يلا بينا نبتدي في فقرة نقد الجوانب السلبية في اللعبة بشكل مركز, المهمات دي بتبتدي تقل في مستوي اللي بتعرضه من الجيمبلاي و تفضل شوية انها تعرض القصة بشكل كبير و دا كان واضح من خلال واحد من الفصول اللي جزء كبير من اللي كنت بتعمله خلاله انك انت بتتمشي مبتعملش حاجة جوا مكان معين. بس دي كانت حاجة بسيطة و يمكن عادية شوية جنب الفصل الـ13من اللعبة اللي هو صحيح كان مدته ساعة تقريبا بس للاسف اضعف فصول اللعبة من الناحية الابداعية و التصميم بشكل خلاني اشك في حاجة من الاتنين, يا الفصل دا اتولي مهام تطويره مطور تاني تماما و كروت تصميمه بالشكل دا يا اما دا نتيجة بعض الافكار القديمة من مراحل تطوير اللعبة الاولية من 10 سنين  اللي كان ممكن يتم تقبلها وقتها. لان مش مقبول الحقيقة حتي لو كان الفصل مدته ساعة في وسط 30 ساعة تنهي فيهم القصة   فيهم الايقاع السريع و المليان اكشن و احداث مهمة و  الجيمبلاي المتصمم بشكل جيد في مهمات اللعبة كلها عموما يجي حاجة مملة  زي الفصل دا.

المهمات الجانبية في اللعبة كانت برضو حاجة ممكن نقول محل انتقاد برضو بسبب اسلوبها التقليدي, من حيث العدد اللعبة فيها كم ضخم جدا من المهمات الجانبية بس معظمهم مش كلهم كانوا عبارة عن اشخاص في عالم اللعبة يطلبوا منك تروح مكان معين يا تجيب حاجة يا تقتل عدد و نوع معين من الوحوش و ترجعلهم تاني يعني نوع المهمات اللي بيتقال عليه مصطلح Fetching Quest

علي سبيل المثال و مش بهرج واحدة طلبت مني اروح اجمعلها 5 ضفادع حمر و بعد كده 5 زيهم صفر, لكن في مهمات تانية بتبقي ممتعة شوية او ليها قيمة و في مهمات تانية بتدي دافع اكبر لاستكشاف عالم اللعبة علي سبيل المثال في مهمة شخص بيبعتني اصورله كذا مكان منهم قبل بركان انا مكنتش اعرف ان الجبل الظاهر في اخر الخريطة دا ممكن اطلعه و يطلع بركان و علي مصادر خطر كتير و سلاح مهم.

لكن هل كانت كل المهمات بالشكل دا للاسف الشديد لا, و بشكل يخلي Final Fantasy XV متاخرة في المنافسة  في وسط التصاميم اللي بتتجه ليها العاب العالم المفتوح حاليا او حتي العاب الـRPG من ناحية ان يكون في شوية تنوع و تجديد من خلالها. بعضكم ممكن يحس من خلال النقد دا للعبة انها عمرها هيكون قصير لان محتوي المهمات الجانبية مش قوي بالشكل الكافي لكن اللي كان غريب جدا ان اللعبة بتوفر بعض المحتوي من مهمات يعني فيها شوية تحدي من Dungeons و Boss Fights و اماكن مخفية ساعات متقدرش توصلها الا بتطوير العربية انها تطير كل دا بعد لما تخلص اللعبة.

و هنا الـEnd Game Content بتاع اللعبة كان الحقيقة حلو جدا و في نسبة تحدي عالي و هو ميعوضش مستوي المهمات الجانبية العادية بنسبة كبيرة بس كان في اهتمام ان اللعبة يكون ليها عمر اطول من خلال المهمات دي

جانب اللعبة تقنيا و فنيا الحقيقة كان فيه ايجابيات كتير و زي ما انتوا عارفين اللعبة منزلتش الا علي الكونسولز حاليا المفروض ان تطوير نسخة البي سي هياخد تقريبا سنة حسب كلام مخرج اللعبة.

فا السؤال الاهم اداء اللعبة علي البلاي ستيشن 4 و العادي بالتحديد مش البرو ايه نظامه ؟؟ شخصيا علي مدار 60 ساعة لعب مقابلتش اي اضطراب في اداء اللعبة تماما الا هي لحظة واحدة بس استمرت لمدة ثانتين. و الحقيقة Final Fantasy XV بالاداء دا مقدمة حاجة تخليني منبهر بانها قدرت توصلها علي الكونسولز خصوصا ان اللعبة في جوانب تقنية تانية زي مثلا الـDraw Distance و مدي انتشار و تفاصيل اي حاجة علي مدي بصرك يعتبر عالي جدا و افضل من العاب Open World كتيرة انا لعبتها علي البلاي ستيشن 4.

دا غير ان اصلا اللعبة من الناحية الجمالية و الفنية الحقيقة كانت ممتازة و جميلة و مناظر كتيرة جدا الواحد فضل واقف قدامها يتفرج عليها.

و مستوي الـAnimations في اللعبة برضو كان حلو جدا وسط اي مواجهة خصوصا لما تلاقي في Linking بيتعمل لحركات الشخصيات, لكن في بعض التفاصيل اللي كانت مش بنفس العالي لباقي اللعبة زي مثلا تفاصيل وشوش الشخصات اللي بتقابلهم و بتشتري منهم اي حاجة اللي ساعات كانت ضعيف شوية او بعض الاماكن اللي كان في تفاوت في جودة الـTextures بتاعتها, هي حاجة زي كده مكنتش منتشرة بشكل كبير في اللعبة كلها بس كانت ملحوظة.

بالنسبة للاصوات هتكلم الاول علي الـVoice Acting للشخصيات, في الاول الحقيقة هو كان بيدي احساس لحد بقي لما الواحد يكون اتعود ان اصلا اللعبة معمولة  اساسا ان الاصوات فيها بالياباني لان انفعالات الشخصيات باللغة دي بالتحديد و نبرة صوتهم كانت افضل شوية  من الاصوات الانجليزي في اللعبة مع ان في شخصيات زي الـ imperial chancellor  دا كان ادائه ممتاز و يخليك تحس قد ايه هو شخص كريه.

لكن بالنسبة للـSoundtrack كان عظيم و ممتاز و من افضل Soundtracks السنة بكل تاكيد و من افضل اعمال Yoko Shimomura اللي سبق اشتغلت علي العاب كتير زي Mario و kingdom Hearts

اللعبة حتي في جانب الـSoundtrack بتقدم Fan Service ممتازة بان كل Soundtrack الاجزاء اللي فاتت من السلسلة من الممكن تسمعها سواء في العربية او من خلال MP3 Player ممكن تشتريه جوا اللعبة حتي الـtheme بتاع الـChocobos القديم متعاد تلحينه هنا

بس انا عندي تعليق واحد علي الجانب دا و هو ان النقلات اللعبة بتعملها بين كل تراك و التاني تقريبا شبه معدومة اللي هو طبيعي تكون بتسمع حاجة بجو اوركيسترا و تروح مرة واحدة تسمع Blues Rock من اللي ممكن تسمعه في اي محطة بنزين في اللعبة.

تجربة Final Fantasy XV بالمختصر كانت بالنسبالي شخصيا تجربة ممتعة و مستواها جيد جدا لكنها فيها عيوب, فيها عيوب تخليني مقدرش اقول ان اللعبة قدمت تجربتها بشكل مساوي او اعلي من المعايير اللي الواحد بقي يحب يشوفها في لعبة Open World و خصوصا لو كانت RPG.

لكن انا سبق و وضحتلكم تاريخ تطوير اللعبة المضطرب اللي من بعد لما الواحد عرف عنه معلومات كتير احترم و بشدة مجهود فريق التطوير انه هو قدر يوصل باللعبة للمستوي دا علي رغم من عيوبها, لان اي مطور تاني لو كانت اتعرض لنفس الظروف يا المشروع كان هيبقي بمشاكل كتيرة يا كان هيتلغي.

و مخرج زي Hajime Tabata لوفي مشاريع جديدة في السلسلة هو اشتغل عليها من الاول بدون مشاكل في التطوير انا متأكد انه من الممكن يقدم حاجة عظيمة لانه هو من خلال Final Fantasy XV قدم حاجة ترجع السلسلة علي المسار الصح من بعد ما ناس كتير كانت معتبرة السلسلة ماتت

اللعبة انا شخصيا مقدرش اقول غير انها تجربة ممتعة علي رغم من عيوبها و الكومبات سيستم فيها كان مرضي جدا و  قدمت قصة حلوة و عالم متصمم بشكل جميل الناس اللي بتحب الـRPG’s لابد انه تلعب اللعبة

و طبعا انا مش محتاج اقترح اللعبة علي حد من الـFans القدام للسلسلة لانها اكيد مع الـFan Service اللي موجودة فيها قيمة اللعبة هتكون بالنسبالهم اكبر من اي حد تاني.

Movie and anime

Brotherhood elements

Character motivations

Combat system

Magic

Simple crafting

World design

Main missions

Chapter 13

Side missions

Endgame content


skproductions

Advertisement