مقابلتنا مع عُمر الصفطي Fab Lab Egypt General Manager


مع انتشار فاب لاب وانطلاقه بسرعة كبيرة جداً في المجتمع كان لازم نعرف ايه هو فاب لاب ايجيبت و إزاي بدأ و إيه سر الإنتشار الرهيب (بدون حسد يعني 😀 ) وسألنا عُمر الصفطي Fab-Lab General manager.

  • إيه هو فاب لاب ؟

فاب لاب هو إختصار لكلمة Fabrication Laboratory معمل التصنيع بالعربي الفكرة مش جديدة هي موجودة من زمان بره ، والفكرة كالتالي هي عبارة عن global network والموضوع بدأ سنة 2005 تقريباً كان بدأ ينتشر إتجاه في العالم وهو إتجاه أن التصنيع ميكونش مقتصر بس على المصانع والشركات لأ التصنيع دا حق لكل الناس .

فمجموعة من الناس في معهد MIT كانوا عاملين مركز بحثي إسمه Center of Bits and Atoms وبيبحثوا في مجال ال Digital Fabrication أو التصنيع الرقمي كانوا بيفكروا إزاي يخلوا التصنيع الشخصي متوفر للأشخاص بشكل تكنولوجي مش بشكل صناعي ، لأ يبقى في machines سهلة الإستخدام وأسعارها رخيصة وكل شئ يبقى شغال بشكل آلي وبدأوا يعملوا Digital Material أو مواد رقمية .

Prof. Neil Gershenfeld professor at MIT and the director of MIT's Center for Bits and Atoms
Prof. Neil Gershenfeld professor at MIT and the director of MIT’s Center for Bits and Atoms

center-for-bits-and-atoms

بداية الموضوع كانت بكورس هما عملوه اسمه how to make almost anything بدأوا بيه في ناس حضرت وبدأ يبقى في خريجين للكورس دا عايزين مكان يقدروا يشتغلوا وينفذوا فيه افكارهم وبدأوا يفكروا في فكرة الفاب لاب ، انهم يعملوا مكان متوفر فيه ال machines و ال tools اللي تقدر تساعد الناس انها تحول أفكارها لمنتجات أو على الأقل نماذج أولية .

وبداية من اليوم دا عملوا حاجة إسمها media lab وكان أول فاب لاب اتعمل في العالم وهو اكبر فاب لاب إتعمل في العالم وفي نفس ذات الوقت كان بدأ ينتشر مفهوم ال open source فحولوا الموضوع يبقى ال network الخاصة بالكميونتي ونشروا على الإنترنت إزاي اي حد يقدر يفتح فاب لاب والمعايير وال machines و ال tools اللي المفروض تكون موجودة معاك و خلوا البراند نيم مفتوح لكل الناس.

أي حد ممكن يستخدمه ويفتح فاب لاب ومن وقتها كبرت الفكرة دي جداً وبقى فاب لابس في المدارس والجامعات والشركات ومنها الخاص والحكومي و كل فاب لاب منفصل عن التاني بإدارته و برؤيته الخاصة وهل هو ربحي ولا لأ ولكن كل الفاب لابس متجمعة في شبكة واحدة online عشان يقدروا يشاركوا المعلومات والمعرفة دي مع بعض ويساعدوا بعض.

  • إيه هو فاب لاب إيجيبت ؟

فاب لاب إيجيبت هو مكان إحنا بنحب نقول عليه انه maker space أكتر من انه فاب لاب ، ال maker space ممكن تكون أشمل شوية لأن الفاب لاب مركز أكتر ناحية ال Digital Fabrication إحنا عايزين كل أنواع ال making تبقى موجودة.

1957961_461352680632419_2040128471_n

إحنا بدأنا من 4 سنين وكأي حد بيبدأ مش عايزين نعيد إختراع العجلة فبدأنا نشوف الناس اللي بدأت وصلت لفين عشان نبدأ من حيث ما هما وقفوا ، فكان فكرة الفاب لاب هي اكتر فكرة منظمة سهل نبدأ بيها وفي شبكة ضخمة تقدر تساعدك ؛ فبدأنا بيها بس الإختلاف بينا وبينر بره دا أساس فكرة إختلاف الفاب لابس عن بعضها . إحنا شايفين ان الفاب لابس بتفتح في العالم عشان تحل مشاكل ، مشاكل مصر مختلفة عن مشاكل العالم الخارجي أو العالم الأول .

لو إحنا اتكلمنا عن مشكلة التصنيع في الأول فهي في الأساس مشكلة تعليم فإحنا هدفنا في الأساس إننا نساعد الناس انهم يتعلموا المهارات اللي هما مش هيقدروا يتعلموها في المدارس والجامعات ودا عن طريق توفير ال machines والأدوات اللي الناس بتحتاجها عشان تنفذ أفكارها بس المشكلة والفرق بينا وبين بره ان بره هما عندهم فكرة وعندهم شوية مهارات بيقدروا يوظفوها عشان ينفذوا الأفكار دي لما بيروحوا لأقرب فاب لاب ليهم .

هنا في مصر الناس معندهاش المهارات دي فبدأنا نتجه اننا نعمل ورش عمل والكورسات و ال crash courses عشان نعمل كميونتي عنده مهارة وخبرة يقدر لما يكون عنده فكرة يبقى عارف على الأقل يروح فين وييجي منين بس انا عايز اقول ان فاب لاب هو maker space بيوفر الأدوات اللي الناس محتاجاها عشان تنفذ الأفكار دي لمنتجات او نموذج أولي.

  • إيه اللي شدك لفكرة الفاب لاب من البداية ؟

طيب  في البداية انا مش من الفاوندرز الرسميين ، انا موجود من اليوم الأول بس قانوناً الفاوندرز هما 4 اشخاص: د.دينا الزنفلي ، م.هشام خضير صاحب شركة Future Group ، وأخويا م.محمود الصفطي شغال في شركة VMware بأيرلندا ، و م.محمد عبد الخالق شغال في شركة Giza Systems.11027487_10152958308813425_7912981271068421169_n

10665314_10154940515160385_6247947885048849753_n
404769_10151199984665433_70930681_n

هما بدايةً مكانوش يعرفوا بعض نهائياً من قبل ما يتجمعوا عشان يعملوا فكرة فاب لاب إيجيبت ، والموضوع بكل بساطة ان م.هشام أُعجب بفكرة الفاب لاب و بدأ يدور على الإنترنت إزاي يعمل فاب لاب فبعت ل Center of Bits and Atoms وقالهم انا عايز افتح فاب لاب فوصلوه ب د.دينا وقالوا له انها كان عندها نفس الفكرة وعندها ال experience .

هما الإتنين إتعرفوا على م. محمود عن طريق جروب إسمه Cairo Hacker Space و إنضم ليهم واتفقوا انهم يفتحوا فاب لاب ،و الموضوع بقى ليه رؤية و structure كان مع الوقت بس في البداية كانوا عايزين يعملوا حاجة للكميونتي كانت فكرة جديدة من نوعها محدش عملها في مصر و مفيش حاجة يبنوا على أساسها فقعدنا فترة لغاية ما قدرنا نحدد إحنا عارفين نعمل خدمات إيه و الكلام دا كله . انا جاي عشان أخويا 😀 انا اخويا جابني في الأول مكانش عندي معلومات عن الفكرة فجيت معاه و بدأت أُعجب بالفكرة جداً فضيت نفسي ليها بالكامل.

  • هل MIT بيدعم اللاب بأي صورة معينة ؟

احب أقولك ان MIT طلعت تصريح بتقول يا جماعة مفيش اي فاب لاب يقول ان MIT ليها علاقة بأي حاجة لأنهم تعبوا من إن الناس بتفهم ان عشان الموضوع بدأ في MIT يبقى هي بتدعمه ف MIT تعتبر ال host الأول لفاب لاب في البداية بس هي ملهاش أي علاقة بالموضوع نهائي .

المسئول عن الفاب لابس وبيدعمهم هي Fab Foundation مش حتى Center Bits and Atoms وهي المسئولة عن متابعة كورس ال  Digital Fabrication اللي اتحول دلوقتي بقى Fab Academy وأكبر شئ هي مهتمة بتنظيمه هو Fab Conference وهو مؤتمر بيتعمل كل سنة في دولة مختلفة بيبقى اسمه Fab ورقم الإصدار دا منه يعني السنة اللي فاتت كان Fab 12 هو شبيه بالميكر فير بس هو مخصص للفاب لابس فقط بيتجمعوا من كل أنحاء العالم كل سنة -في 500 فاب لاب على مستوى العالم- على حد ادنى بيحضر ال Fab Conference مش أقل من 450 فاب لاب من كل العالم .

13886379_825822307518786_5406375346251205933_n

  • طيب ال Mindset اللي فاب لاب بيهدف ليها ايه هي ؟

الموضوع مش موضوع انك بتستهدف mindset معينة بقدر إنك بتصنع ال mindset دي ودي كانت أكبر مشكلة واجهتنا، فكرة فاب لاب في العالم كله هي فكرة ملهاش ملامح صعب إنك تلاقي Maker Space او فاب لاب شغال كشركة وبيجيب ربح او بقى effective جداً ومعظم الفاب لابس اللي بتعمل كده وبتربح بتبقى في الدول الفقيرة لأنهم واخدين ، معظم الفاب لابس اللي بره بتبقى معمولة في جامعة وبتبقى مجاناً وبتبقى لغرض البحث.

فإحنا كان عندنا مشكلتين أول مشكلة مشكلة تمويل لأن مفيش حد مؤمن باللي انت بتقوله فكان التمويل مننا إحنا لفترة كبيرة جداً وإنك ازاي تخلي البيزنس مستمر والمشكلة التانية هي مشكلة ال mindset لو هنتكلم على مثال حقيقي هنرجع 5 سنين مكانش في حد بيحلم أنه يستعمل 3D Printer كانت اقصى طموحات طلبة هندسة أنهم يعملوا robo-arm او ماكينة CNC فوصلنا دلوقتي إن معظم مشاريع التخرج بقت بتتعمل عن طريق ال 3D Printer في شركات 3D Printers كتير وان حد يستعملها بقى بمنتهى السهولة.

العقلية دي ظهرت بسبب ناس كتير إحنا كنا من الناس المؤثرين في الموضوع دا من البداية ، ان الناس تسمع اننا عندنا 3D Printer وتيجي وتحضر ورش عمل وتشتغل بيها و دا بيصنع ال mindset اللي إحنا بنفكر فيها بس عن طريق الصدمة 😀 عن طريق إن الشخص بيعتقد إن الفكرة دي مجرد خيال في دماغه وبيبدأ يدور على النت ويلاقيها موجودة عقله بيبدأ يستوعب ان دا مش مجرد وهم لا دا شئ موجود وحقيقة فعلاً وكمثال لو جه شخص وقال هل ممكن بدلة آيرون مان تتعمل زمان كان ممكن يتقال انه بيهرج او بيقول أي كلام دلوقتي ممكن عن طريق شوية سيرش بسيط تقول له ، اه البدلة ممكن تتعمل بس انت محتاج مصدر الطاقة او محتاج تعمل كذا و محتاج تجيب كذا وهي دي ال mindset اللي احنا بنصنعها وبنهدف انها تبقى موجودة وهي إن الناس الحاجز اللي بينها وبين التكنولوجيا يقل تماماً دا اللي احنا بنحاول نعمله عن طريق فاب لاب او عن طريق maker fair .

12 13901437_821198047981212_5168987230328261308_n

  • اللاب في أول 3 سنين مكانش مشهور ومنتشر أوي وفجأة انطلق : إيه السبب في الإنطلاق دا ؟

طيب هقول كلمة بسيطة أي نشاط او بيزنس لما بيشتغل شوية هو بيجني ثمار شغله بعد فترة ودا الطبيعي انك تقعد فترة شغال بمجهود كبير و مرة واحدة تحصل نطة كبيرة هي نتيجة شغلك وهو دا ملخص ال 3 سنين اللي فاتوا ، فلو جينا على أرض الواقع وإيه اللي حصل من الحاجات المؤثرة في موضوع الشهرة دا هو ال maker fair انت بتتكلم إن اللاب بكل تقله وشغله والناس اللي بتحضر فيه مئات وآلافات ، وفي أول maker fair حضر 5000 شخص في تاني maker fair حضر 10000 شخص الأرقام دي أرقام كبيرة مش بسيطة وبتعني ان كل شخص حضر اول maker fair كلم 3 او 4 وحضروا التاني وعرفوا عن اللاب .

النقطة التانية اللي ساعدت في الموضوع دا هي إن الشغل بقى متيسر نوعاً ما ودا خلانا نتعامل مع partners أعلى مبقيناش شايفين نفسنا مجرد maker space الناس بتجيلنا وخلاص ، إحنا شايفين إننا بنعمل حاجة مختلفة عن بقية الناس فإحنا محتاجين نشتغل مع ناس اكبر وبدأنا نشتغل مع Intel, EMC^2, Giza System, Orange Egypt الشركات بقوا clients معانا وشغالين مع شركة Orange Egypt في مشروع إننا نفتح فاب لاب في المحافظات فالحاجات دي هي اللي ساعدت على إنتشار اللاب .

 

  • طيب إنتوا كمنظمة غير هادفة للربح ، إزاي بتنظموا الموضوع دا ؟

انا عايز اشيل اللبس اللي في الموضوع إحنا فاب لاب Social Enterprise وفي فرق بين منظمة غير هادفة للربح ومنظمة مش بتربح ، غير هادفة للربح يعني الأولوية مش للربح ودي فكرة ال Enterprise في العالم إنها تكون بتقدم service او بتخدم كميونتي كله ، هو عايز يكسب فلوس بس هدفه الأول انه يفضل بيقدم ال service للكميونتي مش هيحط الربح فوق الكميونتي ، يعني مثلاً مينفعش اني مرة واحدة كده في يوماً ما اعمل حاجة تضر الكميونتي عشان شوية فلوس هتجيلي.

 

  • طريقة التفكير الميكر العربي أو المصري هي تختلف عن الميكرز في دول العالم الأول زي أوروبا أو امريكا هل هي أقل أو اعلى أو في نفس المستوى ؟

13887039_819528364814847_1370201665387324270_n 13895544_819528228148194_8355472490078470096_n

طيب مبدأياً كده مفيش حاجة إسمها ميكر عربي أو ميكر مصري إحنا بنقول we are all makers بمعنى إن الميكرز في العالم كله حاجة واحدة ؛ الفرق في الشخصية المصرية أو العربية بمعنى إنك لو اخدت الشخصية دي في حاجة تانية غير ال making هو مختلف عن الناس اللي بره لأن العوامل اللي حوليك مختلفة .

ممكن نتكلم عن الشريحة المستهدفة في العرب أو المصريين اللي مهتمين بالكميونتي مختلفين إزاي لأنه بمجرد انه بقى maker هو بقى زيه زي اللي بره .

في حاجات حلوة وحاجات وحشة ، من الحاجات الحلوة : إن الناس هنا عشان  في مشاكل كتير في حياتها تحلها فكمية الأفكار اللي ممكن تجيله و ينفذها اكتر بكتير من اللي بره ودا بيخليه عنده حلول كتير وسهلة ، حاجة تانية إحنا متعودين على الفقر 😀 ، فطرق حلولنا على طول أرخص وعندنا ناس بتعمل المستحيل يعني مثلاً انت لو شوفت بروجيكت بيتعمل بره ب X لو جيت اديت نفس البروجيكت دا لحد هيقعد يفكر شوية يومين مثلاً ويعمله بربع تمنه.

الحاجة التالتة هي تقريباً نفس الحاجة التانية وهي إن الناس هنا بتحب تعافر بمعنى إن انت لو حطيت قدامه بروجيكت وهو مقتنع من جواه أنه عايز يعمله هو هيعمله وهيعافر لغاية ما ينفذه ، وحاجة تانية الكبت اللي عندنا الطاقة اللي إحنا مش عارفين نخرجها لما بتخرج في ال making بتبقى حاجة حلوة جداً .

الحاجات الوحشة كالتالي اول حاجة هي المجتمع نفسه بيجبرك أنك تدرس حاجة انت مش حاببها وتشتغل حاجة غصب عنك والكلام دا بيموت معظم الميكرز في الاخر لأنه في الاخر هيضطر انه يسمع كلام أهله انه لازم يدور على وظيفة وان الكلام دا مش هيأكل عيش ومش هيفيدك بحاجة في الشغل .

الحاجة التانية إن احنا معندناش maturity في البيزنس بمعنى إن making for fun دا شئ جميل هو أصلاً فكرة فاب لاب وال maker space لما قامت كان هدفها ترتقي بالمجتمعات لحاجة أعلى بمعنى أصح تخلي المجتمع مجتمع منتج ، المرحلة دي إحنا لسه قدامنا فترة عشان نوصل لها بمعنى أوضح إن make for fun دا شئ حلو وجميل بس لما تبدأ تيجي تشتغل وتطلع ببيزنش مفيش حاجة بتظهر ، سوق الهاردوير واقع شوية في مصر على عكس السوفت وير اللي بدأ يتحرك بصورة كويسة.

الحاجة التالتة إن احنا متأخرين بمعنى ان الشخص نفسه متأخر مش كتكنولوجي لأ إحنا كتكنولوجي قادرين نستوعب وفاهمين كويس التكنولوجي اللي بتطلع بس متأخرين من ناحية تحديد الهدف و تنظيم الوقت ، يعني الشخص بره عنده شخصية ثابتة هو عارف هو عايز إيه ، منظم وقته ، عنده مجموعة من المهارات سواء إتعلمها في الكلية أو في المدرسة مخلياه إنه لما يكون عنده فكرة يكون عارف يشتغل على طول وعارف هو هيروح فين وهيبدأ منين ؛على العكس في الوطن العربي وفي مصر تحديداً هنا الشخص بيتخرج من الكلية معندوش أي مهارات ولسه هيبدأ يتعلم وياخد كورسات وبدل ما كان هيبدأ وهو عنده 16 أو 17 سنة لا دا هو هيبدأ وهو عنده 21 سنة ولسه هيبدأ من الصفر .

 

  • بالنسبة لحجم التأثير اللي عمله فاب لاب على الكميونتي وصل قد إيه من البداية لغاية دلوقتي ؟

12472444_1704601256488469_1836077512731576969_n 12472582_1704595189822409_7600752505674119770_n 12472770_1704592966489298_1019074280160060228_n

طيب مبدأياً هتكلم عن ال maker fair إننا نطلع من أول 4 سنين مكانش في حد يعرف حاجة إسمها making وفي maker fair الأول يحضر 5000 شخص و maker fair التاني يحضر فيه 10000 شخص رقم زي دا يدل على حجم التأثير اللي عمله فاب لاب في الكميونتي .

لو هنتكلم بالأرقام فهنتكلم عن رؤية اللاب وهي انه يبقى في فاب لاب في كل محافظة مش لازم تكون بتاعتنا إحنا بس المهم ان يكون في شبكة من اللابات ،تسهل لكل الناس الوصول للأدوات اللي هما محتاجينها ولأننا بنكره فكرة إن القاهرة يكون فيها كل حاجة ، وإحنا بدأنا الرؤية دي من أول يوم وبنتكلم دلوقتي في 5 فاب لاب في 5 محافظات هيخلصوا إن شاء الله على شهر 12 وفي مشروع تاني شغالين فيه مع EMC^2 و Giza Systems والمراكز الثقافية للعلوم وهي إن في 5 فاب لاب كمان هيفتحوا في السنة اللي بعدها دول مختلفين خالص .

فإحنا بنتكلم في مجموع 10 غير اللي في القاهرة هنا ودا شئ عظيم جداً إننا في خلال 5 سنين نكون فتحنا 10 فاب لاب و وصل ال  validation بتاعنا إننا بقينا في ال maker fair بنتعامل مع clients كبار مش معنى كده إن الclients قبل  كده كانوا صغيرين بس إنتشارنا كبر و بقى لينا تعامل كبير مع شركات كبيرة زي intel و Orange وفي بعض الشركات إحنا بنتعامل مع الشركة العالمية مش مع الشركة المصرية زي Orange مثلاً إتعاملنا مع Orange International و بعدها بقينا نتعامل مع Orange Egypt بناءاً على توصية من الشركة الأم.

الstaff بتاع اللاب كان لمدة سنتين ونص متطوعين بالكامل مفيش اي شخص بياخد ولا مليم ،دلوقتي في 9 أشخاص بيقبضوا مرتبات و 9 كمان بيقبضوا par-time job وعندنا 60 واحد في الكميونتي متطوعين بيشتغلوا معانا وقت ما يحبوا ودا نمو محترم ،وبننقل لمكان جديد اللي هو يُعد مكان أحلامنا تقريباً 😀 .

 

  • بالنسبة للمكان الجديد ليه المعادي ؟

    14224879_847386548695695_7335347663625794166_n

طيب مبدأياً في مصر انت لو قولت أي مكان هتتسأل وليه المكان دا ، المشكلة إن مفيش مكان قريب للناس كلها ،على أرض الواقع المعادي أقرب مكان لكل الناس مثلاً مدينة نصر ومصر الجديدة والتجمع الخامس وشرق القاهرة تقريباً بينهم وبين المعادي نص الوقت اللي بينهم وبين وسط البلد وعشان الزحمة لأنك هتتجنب كوبري 6 أكتوبر .

الناس اللي عايشة ناحية الهرم وفيصل والجيزة ،المسافة بينهم وبين المعادي كوقت هي هي نفس الفترة الزمنية اللي بينهم وبين المهندسين ، أما الناس اللي عايشة في أكتوبر كل حاجة بعيدة عنهم فمش فارقة 😀 بل بالعكس في مواصلة من أكتوبر للمعادي مباشرةً . والنقطة المهمة إننا مكناش هنلاقي مكان كبير كفاية يسع كل اللي إحنا عايزينه و في مكان حيوي مش بعيد غير المعادي .

 

  • لو إحنا رجعنا تاني بالزمن للحظة اللي إنت قررت تشارك في فاب لاب هل أنت كنت هتاخد نفس القرار دا ؟

اه بدون أي شك ، عايز اقول إن اللاب دا أحسن حاجة حصلت في حياتي انا لحد دلوقتي بشكر أخويا انه عرفني على اللاب .

 

  • إزاي فاب لاب عرف يُنشئ العقلية بتاعة الmaker و يجذب الناس ليه ؟

الحلو في اللاب وهو اللي ساعد على إنتشار اللاب دا بسرعة كبيرة والتأثير فيها كان غير مقصود هي نقطة إلتزام اللاب بالكميونتي اللي حوليه أو ان هو بيفضل الكميونتي على الباقي ،الحاجة الحلوة في اللاب واللي خلت ناس كتير تفتح ومتكملش أو تفتح بس معرفتش تكمل بصورة كويسة هي نقطة الكميونتي .

إحنا أول ما بدأنا كنا متطوعين بالكامل لمدة سنتين ونص ،فإنك انت يبقى حوليك ناس بتقدر اللي أنت بتعمله ،والمكان بيقدرهم دي مش موجودة في كل مكان وبالذات لما تكون حقيقي مش fake.

في maker spaces كتير وبيطلعوا يتصوروا وبيظهر إن الناس كلها بتحب بعض و لكن على أرض الواقع مفيش الكلام دا خالص ،

ومش معنى كلامي إن الناس لازم تكون بتموت في حب بعض ممكن يكون في مشاكل والناس متضايقة من بعض بس في النهاية الناس كلها مقدرة المصلحة العامة على المصلحة الفردية وإن لما المصلحة العامة بتيجي الناس بتبص لها على حساب المصلحة الفردية .

دي حاجة إحنا ملناش فضل فيها ،الفضل دا يعود للناس فعلاً اللي جات المكان وطلعوا كلهم بالعقلية دي المكان كان عبارة عن مغناطيش جذب الناس اللي دماغها نضيفة كده ،الناس دي لما إتجمعت هي اللي وصلت اللاب للمرحلة دي واللاب مكانش هيوصل للمرحلة دي من غير الناس دول .

اللاب حصلت مشاكل كتير و كان في drops كتير اللي هي إن اللاب معروف وإسمه مسموع بس كان في أوقات بتعدي علينا مفيش مليم نهائي والكلام دا مكانش بيطلع لحد لأن الكميونتي مُخلص وعارف هو بيعمل إيه . الناس كانت بتستحمل مكانش في حد بيتكلم وكانوا بيشتغلوا مش بأسلوب إنه بيُمني عليه ؛ لأ هو بيشتغل عشان عارف إنه هيتم تعوضيه قدام بشكل أو بآخر ،فالناس مقدرة التواصل اللي بينا وبين بعض معرفش ليه الصراحة دي حاجة من عند ربنا.

 

  • إيه الهدف اللي اللاب بيفكر فيه الفترة الجاية ال short term plan و ال long term plan ؟

عامةً الرؤية بتاعتنا ثابتة كده كده مش هنهدا غير لما نحققها كلها وهي إن احنا يبقى عندنا فاب لاب في كل محافظة .

الرؤية بتاعتنا التانية هي إن يبقى عندنا كميونتي من 2 مليون ميكر ،ومش لازم يكون maker محترف بيصنع طيارات بس يبقى maker عارف هو لما يحب يعمل فكرة يقدر يعمل إيه مش مجرد شخص مستهلك،تالت حاجة إننا عايزين يبقى عندنا world class product designed in Egypt.

بمعنى أصح حاجة بمستوى عالمي ينفع نقول عليها Designed In Egypt، وليه Designed In Egypt الفكرة كلها إنك يبقى عندك مُنتج مصري مُصمم في مصر ، أما موضوع التصنيع فالعالم كله بيصنع في الصين و دي مش مشكلة خالص ،دا على مستوى ال long term plan .

على مستوى ال short term plan المكان دا يوصل للشكل اللي إحنا متخيلينه ،المكان دا إحنا عايزينه يبقى أكبر hub لل maker movement في مصر ،المكان دا إن شاء الله هيبقى فيه أدوات أكتر من المكان القديم ، هندخل ال craft ، مش هبوح بالحاجات دي هي هتبقى exclusive ، إحنا عايزين نخلي المكان دا خلية نحل عايزين الناس تيجي المكان دا هنا حاسة إن المكان productive مش fake .

  •  بمناسبة Designed In Egypt هل ممكن يطلع مُنتج مصري من الكميونتي ؟

aa853610274c756589544d967616c7e5_original

اه إحنا قربنا خلاص وبقى في منتجات موجودة على أرض الواقع في أمثلة موجودة في مصر فعلاً بغض النظر عن قوة المشروع هو مُنتج مصري خرج بره وممكن أي حد بره يكون عارفه ، وعلى سبيل المثال 1sheeld و مثال تاني simplex ، وفي حاجة من الحاجات الجديدة في المكان إننا هنستضيف ستارت ابس ، فأقدر اقول إحنا عايشين في العصر دا اللي هو في مُنتج بدأ يخرج إنما إن يظهر منتجات قوية وكتيرة ويبدأ عصر التصنيع الرقمي بقوة لسه شوية على الموضوع دا بس قربنا جداً.

 

  • إيه هي الأفكار اللي اللاب ناوي عليها بالنسبة للكميونتي في الفترة الجاية ؟

طيب انا مش هقول غير إنتظروا المكان 😀 ، المكان دا دلوقتي هو أكبر حاجة إحنا عايزين نعملها إحنا كل تركيزنا على المكان دا دلوقتي ، المشاريع اللي إحنا شغالين عليها بره هي شغالة بنفسها ومتابعينها بس تركيزنا الأكبر على ال hub وال  crafts والحاجات التانية هي دي المفاجأة ، هي مش هتدخل كلها مرة واحدة بس بعد 5 شهور من دلوقتي هيبقى في حاجات محدش إتكلم عنها في مصر .

 

  • خطط اللاب مع Giza Systems في الفترة الجاية ؟

إحنا شغالين دلوقتي معاها على بروجيكت إسمه fab-lab on wheels أو فاب لاب المتحرك ومعانا partners EMC^2 ومعانا المراكز الإستكشافية للعلوم .

إحنا الأربعة شغالين على البروجيكت دا وهو عبارة عن اتوبيس فاب لاب متنقل هيلف 5 محافظات في أول مرحلة ليه ، فكرة الفاب لاب المتنقل دا أنه هيقعد في كل محافظة شهرين الشهرين دول الناس ليها دخول لكل الأدوات اللي موجودة فيه و الناس هتحضر ورش عمل واللاب ماشي هيسيب maker space في المحافظة دي ، وإن شاء الله خلاص البروجيكت دا على وشك الإنطلاق.

 

  • طيب إنت كعمر الصفطي إيه هو أملك وطموحك بالنسبة للاب أو بمعنى أصح ال ultimate goal ؟

طيب هو الكلام اللي ممكن أقوله هو كلام عايم شوية بس هو فعلاً اللاب بقى حياتي بمعنى الكلمة ، انا مش شايف حياتي غير اللاب ،ودا شغلي أنا خلاص بقيت متفرغ للاب ، فالواحد لما يكون حابب حاجة اوي مش بيكون شايف حلم نهائي لأنه طول الوقت هيفضل قاعد بيحسن فيه بس حالياً انا حلمي إن اللاب كان يوصل للي هو فيه دلوقتي ، على المدى البعيد أنا حلمي إن اللاب يكون في 28 محافظة وأنا حاسس أن اللحظة دي قربت أوي ، ونفسي إن ال maker fair نفسي إنه يحضر فيه عدد زي في maker fair New York .


Islam Quantum

Tech guy, love anime, music, movies, comics, quantum mechanics, manga , technology , gamer . Simply this is my world 😃

Advertisement